Newyddion - GORFFENNAF / AWST

CYFOETH NATURIOL CYMRU A PHYSGOTWYR

Mae fy nghyfaill a'm cydweithiwr Allan Cuthbert, unwaith eto, wedi ailadrodd ei alwad am i bysgotwyr "ddechrau ailsefydlu perthynas waith gyda Chyfoeth Naturiol Cymru". Mae'n mynd yn ei flaen i ganmol y swyddogion yr ydym yn gweithio gyda hwy "wyneb yn wyneb". Mae apêl Allan bellach wedi ymddangos yn ei adroddiad pysgodfa Dyfrdwy a Chlwyd, yng nghylchgrawn misol Trout and Salmon, dros y misoedd diwethaf.

Mae ei gri yn un yr wyf yn ei gefnogi yn gryf. Yn wir, gwneuthum yr un pwynt mewn cyfarfod y llynedd, ar gyfer pysgotwyr yn unig, yng Nghorwen.
Yr wyf yn ei gefnogi'n llwyr yn hyn o beth.

Pan oeddem yng nghyfarfod y Grŵp Pysgota Lleol ar y cyd yn y Bala ym mis Rhagfyr y llynedd, gwnaed yr un apêl gan Miss Clare Pillman, Prif Swyddog Gweithredol Cyfoeth Naturiol Cymru.

Mae'n ymddangos ein bod ein tri yn cytuno.

Fe'm hatgoffwyd o hyn gan farwolaeth John Hume, yr wythnos diwethaf. Pwy?

Os nad ydych wedi clywed amdano, roedd yn ddyn o Derry a dreuliodd ddeng mlynedd ar hugain yn straffaglu i ddod â heddwch i Ogledd Iwerddon. Heb os nac oni bai, cyfrannodd ei waith at y cynnyrch terfynol, sef cytundeb Dydd Gwener y Groglith.

Beth bynnag fo'r achos, er mwyn dod i gytundeb, rhaid cael symudiad. Mae angen i symudiad o'r fath gael ei gyplysu â goddefgarwch, dealltwriaeth a pharch, gan y naill ochr a'r llall.

Yn fachgen ifanc, tra yn Iwerddon gyda fy nheulu, gallaf gofio bodolaeth rhaniadau - hyd yn oed o fewn fy nheulu fy hun. Ni ddylid byth ganiatáu i hyn ddigwydd - ac, yn anad dim, o fewn y gweithgaredd yr ydym i gyd yn ei charu, ei mwynhau ac, yn ein gwahanol ffyrdd ein hunain, yn gweithio i wella.
Ni ddylai rhaniadau fodoli!

SEFYDLIAD YMFUDO PYSGOD Y BYD Mae'r diagram "HELP" canlynol yn ymddangos drwy ganiatâd caredig y sefydliad uchod. (www.worldfishmigrationfoundation.com) Mae'n gryno ac yn ystyrlon. Yn y newyddion ym mis Mai Mehefin soniais am ymgais o Gymru yn y gystadleuaeth State Fish Art. Llongyfarchiadau Bryn ar dy lwyddiant. I weld rhestr lawn o'r canlyniadau ewch i'r linc isod. Daw Cymru, yn nhrefn yr wyddor, ar y diwedd. Wedi dweud hynny, mae’r rhestr drawiadol o wledydd yn dangos o ble y daw ein hartistiaid pysgota ifanc. Daeth cyfanswm o 2,700 o geisiadau o 27 o wledydd. Mae'n werth mynd trwy’r rhestr gyfan! Bydd y gystadleuaeth hefyd yn cael ei chynnal yn 2021. Efallai y gallwn weld mwy o geisiadau o'r DU? Roedd rhai cystadleuwyr o’r DU, fel y mae fy nghyswllt yn nodi: “The state-fish art competition is over for now but we did have some participation from the UK and the two honorable mentions from there are on this page”. https://www.wildlifeforever.org/home/state-fish-art/winners/1st-place-international-winners-2020/ Cymru yw "Gwlad y Gân"? Efallai eich bod yn teimlo eich bod yn cael eich cyflyru i gyfansoddi! Mae cystadleuaeth barhaus o'r enw International Eurofishion Song Competition. Ar gyfer y gystadleuaeth cyfansoddi cân yma, gall unrhyw un gyflwyno eu ' cân cariad ' am bysgod a mudo pysgod! Mae hwn yn cau ym mis Hydref 2020. Edrychwch ar y dudalen yma i weld yr ymgeiswyr eraill: www.eurofishion.com Mae oedolion a phlant yn cymryd rhan! Y wefan berthnasol arall yw www.seppo.net! Efallai y gallai hefyd fod o gymorth ar gyfer addysg gartref?

PANDEMIG.

Er ei bod yn ymddangos bod glan yr afon neu ymyl y llyn yn ddiogel, mae'n bwysig cofio bod y firws yn dal i fod o’n cwmpas a bod angen parhau i fod yn ofalus.
Osgowch dorfeydd lle bynnag y bo'n bosibl - cofiwch ymbellhau’n gymdeithasol - defnyddiwch gel ar eich dwylo - golchwch eich dwylo mor aml â phosibl - gwisgwch fasg (hyd yn oed os yw'n cuddio'ch wyneb golygus!) - parhewch i fod yn wyliadwrus.
Mae disgwyl i gynnydd sydyn yn yr haint ddigwydd yma ac mae’n digwydd eisoes mewn mannau eraill - ac eithrio Seland Newydd!!!!

BODDI! Cefais fy atgoffa, wrth wylio angorfeydd yn cael eu gosod y diwrnod o'r blaen, yn fy harbwr lleol, o'r hunanfoddhad y gellir ei arddangos o ran ein diogelwch ein hunain cyn belled ag y mae cychod bach yn y cwestiwn. Doedd neb yn gwisgo siacedi bywyd – a elwir fel arall yn PFDs, yn y byd pysgota masnachol! Mae hyd yn oed gweithwyr proffesiynol yn methu. Nid yn hir yn ôl, ym mis Ebrill 2004 mewn gwirionedd, bu farw Meistr Harbwr a'r Meistr Harbwr cynorthwyol Abermaw mewn amgylchiadau tebyg. Yng ngeiriau'r Crwner " Bydd yn parhau'n ddirgelwch pam y cafwyd hyd i'r ddau ddyn heb siacedi achub ". Ym 2019, archwiliodd The UK Marine Accident Investigation Board i mewn i ddamweiniau a oedd yn cynnwys naw cwch pysgota. O'r chwe marwolaeth, mae'n bosibl na fyddai tri wedi digwydd pe bai PFDs wedi cael eu gwisgo. Nodaf hyn, oherwydd ar y 18fed o Fehefin, ar Lough Kiel, yn Donegal, boddwyd tad a mab wrth bysgota o gwch bach. Achubwyd perthynas yn eu harddegau. Mae'n ymddangos nad oedd neb yn gwisgo PFD. Diwedd trist ofnadwy i wyliau teuluol! Angen i mi ddweud mwy? Arhoswch yn ddiogel ar y dŵr ac wrth ei ymyl!

Trwyddedau.

Mae ymchwil a wnaed gan y Gynghrair Cefn Gwlad yn dangos bod tua 142,000 o drwyddedau Asiantaeth yr Amgylchedd/CNC wedi'u gwerthu rhwng mis Ionawr a mis Mawrth eleni. Yn dilyn hyn, pan daeth haul ar fryn ychydig yn fwy disglair, rhwng y 13eg o Fai a'r 9fed o Fehefin gwerthwyd mwy na 335,000 o drwyddedau. Cynnydd o 230% a 200,000 yn fwy nag am yr un cyfnod yn 2019. Efallai bod mwy o bysgotwyr na chefnogwyr pêl-droed o hyd? Yr hyn nad ydym yn ei wybod eto yw faint oedd yn drwyddedau eog, na faint o drwyddedau eog fydd yn cael eu prynu eleni efallai.